Descrición #
Despois de estar argallando coa Black Pîll para aprender un pouco sobre o procesamento de son, a verdade é que non é moi difícil chegar ao límite das súas capacidades.
Ocorreuseme facer unha placa que usara un micro máis potente, un da serie STM32H7, que tivera máis RAM e máis potencia de cálculo, e co encapsulado máis pequeno posible. En definitiva, quería a “Pill” definitiva que non me fixese botar nada de menos. De aí o de “The One Pill”.
O STM32H725RG ten un encapsulado VFQFPN68, que mide só 8x8mm. Cumple todo o que estaba a buscar, pero a verdade é que está supoñendo todo un reto soldar ese encapsulado de xeito manual. Mentres escribo esta breve nota sobre o proxecto, aínda non conseguín funcionar ningunha placa e o único que teño polo de agora son chips queimados.
Máis dificultades #
O método de alimentación tamén está resultando complicado. A serie STM32H7 leva un LDO interno (un regulador de voltaxe coma os de toda a vida), e tamén unha SMPS (unha fonte de alimentación conmutada) integrada co micro. Estudar todas as posibilidades de alimentación é xa de por si algo que leva tempo.
Tiña dúas posibilidades: alimentar o micro externamente e olvidarme da SMPS interna, ou utilizar a SMPS interna para poder regular os niveis de alimentación co core, e así poder aproveitar as súas capacidades de traballar en modos de baixo consumo.
A pega é que xustamente este encapsulado pequeno é un pouco diferente dos demáis encapsulados, e non ten o LDO que sí teñen os outros. Así que só pode empregar a SMPS interna. A isto hai que sumarlle que a documentación non é precisamente moi clara, e tan só chegar á conclusión de que non hai ningún LDO xa me levou un tempiño.
Pode que puxera os bois por diante do carro cando solicitei a certificación de hardware aberto da OSHWA (o número de certificación é o ES000046), pero aínda non tiro a toalla de conseguir que esta placa funcione.
Descarga #
Toda a información sobre o proxecto, aquí.